Recriwtio’n agor ar gyfer Prif Gwnstabl nesaf Heddlu Dyfed-Powys

Recriwtio’n agor ar gyfer Prif Gwnstabl nesaf Heddlu Dyfed-Powys

Yr wythnos hon, lansiodd Dafydd Llywelyn, Comisiynydd yr Heddlu a Throseddu, y broses recriwtio ar gyfer Prif Gwnstabl newydd i arwain Heddlu Dyfed-Powys.

Yn gynharach eleni ym mis Ebrill, cyhoeddwyd y byddai'r Prif Gwnstabl blaenorol, Dr. Richard Lewis, yn ymddeol ar ôl gyrfa 25 mlynedd ym myd plismona. Yn dilyn ei ymddeoliad ym mis Mehefin, mae'r Comisiynydd Heddlu a Throsedd Dafydd Llywelyn wedi bod yn ymgynghori â staff a swyddogion i gael dealltwriaeth o farn swyddogion a staff ar ba rinweddau maen nhw'n chwilio amdanynt mewn arweinydd, meysydd y dylai arweinydd newydd ganolbwyntio arnynt, ac ar y broses recriwtio ei hun.

Mae Heddlu Dyfed-Powys, sy’n cwmpasu’r ardal ddaearyddol fwyaf yng Nghymru a Lloegr, yn enwog am ei ffocws cryf ar y gymuned a’i fodel Plismona Bro ac Atal arloesol. Disgwylir i’r Prif Gwnstabl nesaf barhau i ddatblygu’r sylfaen hwn, gan sicrhau plismona effeithiol ac amlwg ledled Sir Gaerfyrddin, Ceredigion, Sir Benfro a Phowys.

Dywedodd Dafydd Llywelyn, Comisiynydd yr Heddlu a Throseddu: “Mae hwn yn benodiad hollbwysig ar adeg o gyfle a newid.

“Rwy’n chwilio am arweinydd eithriadol sy’n rhannu ein hymrwymiad tuag at blismona sy’n seiliedig ar y gymuned ac sy’n gallu ennyn ffydd o fewn y sefydliad ac ymysg y cymunedau rydyn ni’n eu gwasanaethu.

“Bydd angen i’r ymgeisydd llwyddiannus arddangos unplygrwydd, arloesedd, a’r gallu i hybu datblygu plismona ataliol sy’n perfformio’n dda.”

Mae’r Comisiynydd yn gwahodd ceisiadau gan arweinwyr dynamig a phrofiadol sydd wedi ymrwymo i wella canlyniadau ar gyfer y cyhoedd, cefnogi’r gweithlu, a chryfhau partneriaethau ledled y rhanbarth.

Mae dyddiadau allweddol yn y broses yn cynnwys:

• Dyddiad cau: 5 o’r gloch nos Wener 29 Awst 2025
• Tynnu’r rhestr fer: 8 Medi 2025
• Cyfleoedd i ymgyfarwyddo: o 9 Medi 2025
• Cyfweliadau: 22 a 23 Medi 2025

Gellir cael rhagor o fanylion am rôl y Prif Gwnstabl ar dudalennau Swyddi Gwag Swyddfa Comisiynydd yr Heddlu a Throseddu.

DIWEDD

Rhagor o fanylion: Comisiynydd Heddlu a Throseddu Dyfed-Powys

Cyswllt: Gruff Ifan OPCC.Communication@dyfed-powys.police.uk