Tîm Cyfiawnder Ieuenctid Sir Gaerfyrddin yn cael eu dyfarnu’n ‘Rhagorol’

Mae Tîm Cyfiawnder Ieuenctid (TCI) Sir Gaerfyrddin wedi derbyn dyfarniad cyffredinol ‘Rhagorol’ yn dilyn archwiliad gan Arolygiaeth Prawf Ei Fawrhydi fel rhan o’i raglen o archwiliadau Gwasanaeth Cyfiawnder Ieuenctid (GCI).

Cafodd y TCI eu harchwilio ar draws tri maes eang – y trefniadau ar gyfer cyflenwi’r gwasanaeth sefydliadol, ansawdd y gwaith a wneir gyda phlant a ddedfrydir gan y llysoedd, ac ansawdd y gwaith datrysiadau y tu allan i'r llys. Cafodd ansawdd y polisi a’r ddarpariaeth ailsefydlu hefyd ei archwilio, a’u dyfarnu ar wahân yn ‘Rhagorol’.

Mae TCI Sir Gaerfyrddin yn derbyn cyllid gan Swyddfa Comisiynydd Heddlu a Throseddu Dyfed-Powys i drosglwyddo’r prosiect cyfiawnder adferol rhanbarthol. Mae gweithio gyda dioddefwyr a dulliau adferol yn parhau’n ganolog i waith y TCI, sy’n un o’r tri Thîm Troseddau Ieuenctid sy’n peilota’r offeryn asesu newydd ar gyfer Datrysiadau y Tu Allan i'r Llys ar ran y Comisiynydd Heddlu a Throseddu.

Dywedodd Martin Jones, Y Prif Archwilydd Prawf: “Mae safon uchel o ofal ac ymroddiad i’r staff, y plant, a’r dioddefwyr sy’n defnyddio’r gwasanaeth, sy’n ymestyn o uwch reolwyr i staff gweithredol.

“Mae’r staff wedi eu hysgogi, yn angerddol, ac mae eu gwaith caled yn cael ei gydnabod a’i wobrwyo’n gyson. Mae’r bwrdd rheoli wedi ei fuddsoddi yn y TCI; y mae wedi eiriol yn barhaus ar ran y gwasanaeth a’i gefnogi’n rhagweithiol i gyflawni’r canlyniadau gorau i blant, teuluoedd, a dioddefwyr.”

Nododd yr adroddiad fod y TCI yn uchel ei barch o fewn y bartneriaeth, gydag arweinyddiaeth gref, fywiog a chyson sydd wedi galluogi’r gwasanaeth i weithredu ei weledigaeth a’i strategaeth yn effeithiol.

Canmolodd hefyd y trefniadau partneriaeth aeddfed a chydlynol sy’n galluogi plant a theuluoedd i gael mynediad at ystod o wasanaethau, gan gynnwys therapi lleferydd, iaith, a chyfathrebu, cefnogaeth addysg gofleidiol, ac ymyrraeth arbenigol ar gyfer plant sydd ynghlwm ag ymddygiad rhywiol niweidiol.

Ychwanegodd Mr Jones: “Mae darpariaeth gwneud yn iawn y TCI hefyd yn drawiadol – mae’r gwasanaeth wedi gweithio gyda’r gymuned i adnabod a chyflenwi prosiectau ystyrlon ac sy’n cael effaith, ac mae plant wedi gallu datblygu sgiliau yn ogystal â chymryd rhan mewn cyfiawnder adferol.

“Y mae hefyd yn rhagweithiol wrth geisio cyfleoedd i ddysgu a gwella’r gwasanaethau y mae’n ei ddarparu o’r sector ehangach, gan gynnwys gwaith gyda phartneriaid yr heddlu wrth fabwysiadu a lleoleiddio dull i blant â phrofiad o fod mewn gofal osgoi troseddoli a chysylltiad diangen gyda’r system gyfiawnder.”

Mae Prif Reolwr y Gwasanaethau Cefnogi Ieuenctid, Gill Adams, sy’n gweithio’n agos gyda Swyddfa Comisiynydd Heddlu a Throseddu Dyfed-Powys yn ddiweddar wedi ennill gwobr gan Ymddiriedolaeth Butler mewn cydnabyddiaeth o’i harweinyddiaeth o TCI Sir Gaerfyrddin. Wrth longyfarch Gill am ei gwobr, a’r TCI ehangach yn Sir Gaerfyrddin, dywedodd y CHTh Dafydd Llywelyn:

“Hoffwn longyfarch y tîm cyfiawnder ieuenctid yn Sir Gaerfyrddin am eu gwaith caled sydd wedi ei gydnabod yn rhagorol yn adroddiad yr Arolygiaeth heddiw.

“Hoffwn estyn fy niolch am yr holl waith y mae’r tîm ynghlwm ag ef, ar y cyd â’r Bwrdd Cyfiawnder Troseddol Lleol a fy swyddfa i. Mae eu cefnogaeth wedi cyfrannu at gyflawni rhai o’r amcanion a nodwyd yn y Cynllun Heddlu a Throseddu cyfredol. Mae hyn yn cynnwys datblygu perthnasau gyda phobl ifanc drwy weithgareddau ymgysylltu a fforwm a gwasanaethau ataliol ar gyfer pobl ifanc sy’n effeithiol wrth ostwng niwed a risg. Mae eu hangerdd a’u hymroddiad yn sicrhau y byddant bob amser yn gwneud yr hyn sy’n iawn ar gyfer plant a phobl ifanc yn Sir Gaerfyrddin.”