10fed Cynhadledd Dydd Gŵyl Dewi’r Comisiynydd Heddlu a Throseddu’n Archwilio Plismona Mewn Oes Ddigidol
Croesawodd Swyddfa’r Comisiynydd Heddlu a Throseddu westeion i’w Chynhadledd Plismona Mewn Oes Ddigidol, a gynhaliwyd wyneb yn wyneb ac ar-lein ar 4 Mawrth 2026 ym Mhencadlys yr Heddlu yng Nghaerfyrddin.
Daeth y digwyddiad â gweithwyr proffesiynol ym maes plismona, sefydliadau partner, busnesau, ysgolheigion a chynrychiolwyr cymunedol ynghyd i archwilio sut y mae technoleg ddatblygol, deallusrwydd artiffisial a bygythiadau seiber yn llunio plismona a diogelwch cymunedol modern.
Dan lywyddiaeth y Comisiynydd Dafydd Llywelyn, roedd y gynhadledd yn cynnwys siaradwyr o ar draws plismona, archwilio seiber ac ymchwil, gan gynnig ymchwil i’r cyfleoedd a’r heriau a gyflwynir gan dechnolegau digidol sy’n datblygu’n gyflym.
Dechreuodd y rhaglen gyda sesiwn yn archwilio sut y mae deallusrwydd artiffisial yn cael ei ddefnyddio’n gynyddol gan droseddwyr a’r perygl y gall hyn ei achosi i bobl agored i niwed. Archwiliodd Luke Pulvirenti, Cydlynydd Deallusrwydd AI, y modd y mae technolegau a gynorthwyir gan AI yn cael eu defnyddio i hwyluso twyll a cham-fanteisio, gan dynnu sylw at bwysigrwydd ymwybyddiaeth ac atal.
Clywodd cynrychiolwyr hefyd fewnwelediad i rôl Canolfan Gyfathrebu’r Heddlu, lle trafododd Karen Marshall a Calvin Griffiths o Heddlu Dyfed Powys y modd y mae systemau digidol, teledu cylch cyfyng ac offer riportio ar-lein yn trawsffurfio cyswllt y cyhoedd ac yn helpu swyddogion i ymateb yn fwy effeithiol i ddigwyddiadau.
Roedd technolegau datblygol yn ganolbwynt arall i’r dydd, gyda’r Ditectif Ringyll Rob Gravelle a James Taylor yn amlinellu sut y mae technolegau ymgolli a realiti rhithwir yn cael eu harchwilio er mwyn gwella hyfforddiant swyddogion heddlu, yn enwedig mewn meysydd fel ymateb cyntaf ac archwiliadau cam-drin domestig.
Archwiliwyd tirlun seiberdroseddu datblygol gan Allan Rush, Archwilydd Seiberdwyll gyda Heddlu Dyfed Powys, a dynnodd sylw at yr amrediad cynyddol o fygythiadau digidol sy’n wynebu unigolion, busnesau a chymunedau o fewn ardal Dyfed Powys a thu hwnt.
Darparwyd safbwyntiau cenedlaethol gan Scott Lloyd, Uwcharolygydd Dros Dro a Chydlynydd Gwyddoniaeth ac Arloesi ar Gyngor Cenedlaethol Penaethiaid yr Heddlu, a wnaeth archwilio’r cydbwysedd rhwng arloesedd technolegol a’r angen am gyfreithlondeb, tryloywder a ffydd y cyhoedd mewn plismona wedi ei alluogi gan AI. I ymuno â Scott, daeth ei gydweithwyr Dominic Edgell, Rhingyll, a Karl Roberts, Arolygydd Dros Dro sy’n gweithio gyda’r Uned Genedlaethol Adnabod Wynebau. Trafodwyd ganddynt y modd y mae adnabod wynebau’n cael ei ddefnyddio ar hyn o bryd o fewn plismona a dangoswyd y model Adnabod Wyneb Byw cyfredol.
Gorffennodd y gynhadledd gyda sesiwn yn edrych i’r dyfodol gan Andrew Staniforth, Cyfarwyddwr Saher Europe, a archwiliodd y modd y mae dulliau rhyngwladol a thechnolegau datblygol yn dylanwadu ar ddyfodol plismona a thu hwnt. Archwiliodd ei gyflwyniad ‘Mewnwelediadau Arloesedd Plismona’r Genhedlaeth Nesaf o’r Tu Hwynt i Ffiniau’r DU’, y modd y mae sefydliadau plismona ar draws y byd yn ymateb i newid technolegol sy’n datblygu’n gyflym, gan dynnu sylw at wersi ac arloesedd a allai llunio dyfodol plismona yn y DU.
Dywedodd y Comisiynydd Llywelyn:
“Rwyf yn ddiolchgar i bob un o’r siaradwyr a’r cynrychiolwyr a gyfrannodd i ddiwrnod mor dreiddgar a wnaeth ysgogi meddwl. Wrth i dechnoleg barhau i ddatblygu, mae’n hanfodol bod plismona, partneriaid a chymunedau’n cydweithio i ddeall y cyfleoedd a’r heriau y mae’n ei gyflwyno. Mae digwyddiadau fel hyn yn helpu sicrhau ein bod yn parhau i fod yn wybodus, yn gydweithredol ac yn barod i ymateb i natur newidiol trosedd mewn oes ddigidol.”
Gwybodaeth bellach:
Article Date: 06/03/2026